ប្រទះឃើញសាកសព បុរសម្នាក់អណ្តែត ក្នុងអាងទឹកត្រពាំងថ្ម
អាទិត្យ ២៩ វិច្ឆិកា, ២០១៥ ម៉ោង ០៩:៥៨
បន្ទាយមានជ័យ៖ កាលពីថ្ងៃទី២៨ វិច្ឆិកា ២០១៥ ប្រជាពលរដ្ឋ បានប្រទះឃើញ សាកសពបុរសម្នាក់អណ្តែត ក្នុងអាងទឹកត្រពាំង ថ្មចម្ងាយប្រហែល៥០០ម៉ែត្រ បង្កអោយភ្ញាក់ផ្អើល នៅខាងលិចភូមិសំបួរ ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ។
សពត្រូវគេស្គាល់ឈ្មោះ ញិ សៀ អាយុ៥២ឆ្នាំ មានទីលំនៅភូមិកើតហេតុខាងលើតាមការបំភ្លឺពីក្រុមគ្រួសារអោយដឹងថា នៅល្ងាចថ្ងៃកើតហេតុ គាត់ស្រវឹងស្រា ហើយដេញវាយប្រពន្ធ ពេលនោះប្រពន្ធបានរត់ចេញពីផ្ទះ ។ បន្ទាប់មក អ្នកភូមិឃើញគាត់ (ជនរងគ្រោះ) ជិះទូកទៅមើលមងគាត់ ដែលដាក់ក្នុងអាងទឹក ត្រពាំងថ្មនៅខាងលិច ភូមិចម្ងាយប្រហែល ៥០០ម៉ែត្រ តែមិនបានឃើញត្រឡប់មកផ្ទះទេ ។
លុះដល់វេលាម៉ោងខាងលើ មានអ្នកភូមិដែលគេទៅមើល មងក្បែរនោះដែរប្រទះឃើញ សាកសពអណ្តែតក្បែរទូក មិនដឹងជាគាត់លង់ទឹស្លាប់ តាំងពីពេលណានោះទេ ហើយក៏បានរាយការណ៍ ជូនសមត្ថកិច្ច។
ក្រោយពីទទួលបានព័ត៌មានភ្លាម សមត្ថកិច្ចមូលដ្ឋាន និងជំនាញបានមកនិងអូសសាកសពឡើងមកគោក ដើម្បីពិនិត្យ តែក្រោយពីពិនិត្យរួច ពុំឃើញមានស្លាកស្នាមអ្វី ប្លែកនោះទេ រួចបានប្រគល់សព អោយទៅក្រុមគ្រួសារ យកទៅចាត់ចែងធ្វើបុណ្យ តាមប្រពៃណីខ្មែរ៕
ដេញប្រពន្ធ ចេញពីផ្ទះជួលរួច នាំស្រីស្នេហ៍ មកឡើងឋានសួគ៌
អាទិត្យ ២៩ វិច្ឆិកា, ២០១៥ ម៉ោង ១០:៣៨
រាជធានីភ្នំពេញ ៖ បណ្តេញប្រពន្ធចេញពីបន្ទប់ជួលនាំសហាយមកដេកលើផ្ទះ ប្រពន្ធទៅរករឿង ត្រូវប្តីស្រែកថា «ចោរៗ» បង្កហិង្សាផ្អើលអ្នកជិតកាលពីវេលាម៉ោង២និង៣០រំលងអធ្រាត្រឈានចូលថ្ងៃទី២៨ វិច្ឆិកា ២០១៥ នៅផ្លូវ27BT បន្ទប់ជួលលេខ១០ ស្ថិតនៅភូមិសន្សំកុសល១ សង្កាត់បឹងទំពុន ខណ្ឌមានជ័យ ។
ស្ត្រីជាប្រពន្ធឈ្មោះ ឆាយ ធាវីន អាយុ៣៣ឆ្នាំ ជាមេផ្ទះស្នាក់ផ្ទះជួលកន្លែងកើតហេតុខាងលើ មានស្រុកកំណើតភូមិកំពង់ភ្នំ ឃុំកំពង់ភ្នំ ស្រុកលើកដែក ខេត្តកណ្តាលចំណែកស្ត្រីជាសហាយឈ្មោះ គីម យី អាយុជាង២០ឆ្នាំ ជាបុគ្គលិកហាងខារ៉ាអូខេ ស្រុកកំណើតនៅខេត្តកំពង់ចាម ។ រីឯប្តីឈ្មោះ ព្រុំ ប៉ុណ្ណា អាយុ៣១ឆ្នាំ ជាអ្នកបើកបររថយន្តរត់តាក់ស៊ីម៉ែត្រ ស្នាក់នៅកន្លែងកើតហេតុ មានស្រុកកំណើតនៅខណ្ឌជ្រោយចង្វារ ។
ម្តាយស្ត្រីជាប្រពន្ធ បានប្រាប់ថា មុនដំបូងកូនស្រីគាត់សុំគាត់ទៅរកការងារធ្វើរស់នៅផ្ទះជួលជាមួយមិត្តភក្កិនៅម្តុំគល់ស្ពានជ្រោយចង្វារ ដែលផ្ទះជីដូនរបស់បុរសជាប្តីក៏បានទាក់ទងស្គាល់គ្នារហូតស្រឡាញ់គ្នាបានជាប្តីប្រពន្ធរស់នៅជាមួយគ្នារយៈពេល១១ឆ្នាំ និងមានកូន២នាក់ ស្រីអាយុ១០ឆ្នាំ និងកូនប្រុសអាយុ៦ឆ្នាំ ហើយបានមកជួលផ្ទះកន្លែងកើតហេតុស្នាក់នៅ ។ ការរស់នៅជាមួយគ្នាជាប្តីប្រពន្ធមិនសូវចុះសម្រុងគ្នាទេ ដោយសារប្តីតែងតែវាយដំប្រពន្ធជាញឹកញាប់ និងលួចទាក់ទងស្រីផ្សេងជាច្រើនលើកមកហើយ លើកចុងក្រោយនេះរយៈពេលជាងមួយឆ្នាំ ដែលបុរសជាប្តីប្រកបរបររត់តាក់ស៊ីម៉ែត្រ ពេលយប់ហើយលួចទាក់ទងស្រីថ្មីដែលជានារីខារ៉ាអូខេ និងបានទៅចូលរួមខួបកំណើតជាមួយគ្នា ថតឱបថើបគ្នា បង្ហោះតាមប្រព័ន្ធហ្វេសប៊ុកប្រពន្ធឃើញក៏មានការឈ្លោះប្រកែកគ្នា ហើយត្រូវប្តីវាយម៉ាទូរស័ព្ទ ។
លុះក្រោយមកទៀត មានការកាំរកូសគ្នា រហូតបុរសជាប្តីបណ្តេញប្រពន្ធឲ្យចេញពីផ្ទះទៅរស់នៅជាមួយម្តាយនៅម្តុំផ្សារប៉េសេ សង្កាត់បឹងទំពុន ខណ្ឌមានជ័យ ប្រមាណជាមួយអាទិត្យ បុរសជាប្តីក៏បាននាំស្រីស្នេហ៍មកដេកនៅលើផ្ទះ ទើបនៅយប់កើតហេតុស្ត្រីជាប្រពន្ធនិងម្តាយរួមទាំងបងប្អូនប្រុសសរុបទាំងអស់៥នាក់ នាំគ្នាទៅសួរនាំស្ត្រីជាសហាយ ហេតុអីបានជាមកនៅលើផ្ទះនេះទៅវិញ ក៏ត្រូវស្ត្រីរូបនោះទូរស័ព្ទហៅប្តីឱ្យមក ពេលប្តីមកដល់ឃើញបងប្រុសរបស់ប្រពន្ធនៅឈរមុខផ្ទះជួលក៏បានស្រែកថា«ចោរៗ» សំណាងហើយដែលប្រជាពលរដ្ឋ ចាក់សោផ្ទះចេញមកមិនទាន់កុំអីមិនដឹងទៅជាយ៉ាងណាទេ ។ មិនតែប៉ុណ្ណោះ បុរសជាប្តីបានយកកាំបិតពីម្តាយរបស់គេមកកាប់ខ្ទេចម៉ូតូ២គ្រឿងម៉ាកស្មាសវី ពណ៌ខ្មៅ ពាក់ស្លាកលេខភ្នំពេញ 1BG-8911 និងស្គូពីមីនី ពណ៌ក្រហម អត់ស្លាកលេខ និងអូសយកទៅទុកក្នុងបន្ទប់ជួលចាក់សោរបងបន្ទប់ជួល ពួកគាត់នៅអង្គុយខាងមុខផ្ទះរង់ចាំសមត្ថកិច្ចមកយកម៉ូតូវិញ ។
ស្ត្រីជាម្តាយបានបន្តទៀតថា កូនស្រីគាត់មកផ្ទះជួលវិញគ្រាន់តែចង់សួរនាំស្ត្រីជាសហាយប៉ុណ្ណោះមិនបានបង្ករឿងអីទេ តែនាងបានទូរស័ព្ទហៅប្តីមកដល់ទើបបង្កទៅជាហិង្សាកាប់ម៉ូតូ២គ្រឿងទៅវិញ ទោះបីជាមន្ត្រីកងរាជអាវុធហត្ថទៅជួយអន្តរាគមន៍ ក៏ភាគីខាងបុរសជាប្តីមិនព្រមប្រគល់ម៉ូតូឲ្យវិញដែរ ។
ចំណែកបុរសជាប្តីវិញ បានអះអាងថា គាត់ជាអ្នករត់តាក់ស៊ីពេលយប់តែងតែមានម៉ូយជាស្រីៗច្រើនណាស់ ហើយប្រពន្ធគាត់តែងតែប្រចណ្ឌរករឿងគាត់ជាប្រចាំ ប្រពន្ធគាត់ជាអ្នកធ្វើការនៅភោជនីយដ្ឋានរបស់បងស្រីគាត់នៅម្តុំវត្តភ្នំ នៅវេលាម៉ោង១២រំលងអធ្រាត្រគាត់តែងតែទៅទទួលត្រឡប់មកផ្ទះវិញ ហើយប្រពន្ធផឹកស្រវឹងជារៀងរាល់យប់រករឿងគាត់ និងមានប្រុសៗជាច្រើនទូរស័ព្ទមករហូតថែមទាំងសុំស្រឡាញ់ទៀតផង ដោយប្រពន្ធរបស់គាត់បើកសំឡេងទូរស័ព្ទឲ្យគាត់ស្តាប់ឮធ្វើឲ្យគាត់ខឹងប្រពន្ធវិញដែរ ។
បុរសជាប្តីបានបន្តថា មនុស្សប្រុសទន្លេ១០មិនស្កប់សមុទ្រមួយ ប៉ុន្តែមនុស្សប្រុសមិនចោលប្រពន្ធកូនទេ កន្លងមក គាត់ធ្លាប់ទាក់ទងស្រីម្នាក់ដែរ តែក្រោយមកបានផ្តាច់ការទាក់ទងគ្នាហើយ ដោយនាងបានវិលទៅស្រុកកំណើតវិញ តែប្រពន្ធគាត់នៅតែប្រចណ្ឌនិងបាននាំបងប្អូនទៅវាយបំផ្លាញរបស់របរក្នុងផ្ទះរហូតវេចបង្វេចរត់ចោលគាត់ទៅរស់នៅជាមួយម្តាយ និងបានទូរស័ព្ទហៅស្ត្រីដែលគាត់ធ្លាប់ទាក់ទងនិងបានផ្តាច់ទំនាក់ទំនងនោះឲ្យមកលេងទៀតផង ពេលដែលនាងមកពីស្រុកកំណើតអត់កន្លែងស្នាក់នៅគាត់ក៏បានហៅឲ្យមកស្នាក់នៅបណ្តោះអាសន្នសិនប៉ុណ្ណោះដោយរាប់អានគ្នាធម្មតា តែប្រពន្ធគាត់នាំបងប្អូនមកវាយនាងដល់ផ្ទះ និងចាក់ម្តាយបង្កើតគាត់ទៀត លុះគាត់មកដល់ឃើញប្អូនប្រុសនៅមុខផ្ទះ គាត់សួរថា មកផ្ទះគាត់ធ្វើអីទាំងយប់ដូចចោរបែបនេះ បែរជាពួកគេយកកាំបិតដេញចាក់រូបគាត់ទៅវិញគាត់ក៏អូសយកបានម៉ូតូ២គ្រឿងទៅទុកក្នុងបន្ទប់ជួលហើយចាក់សោរបងបន្ទប់ជួល ព្រោះគាត់ការពារសុវត្ថិភាព ហើយបងប្អូនខាងរបស់ប្រពន្ធក៏បាននាំកម្លាំងមានកាំភ្លើងនិងវិទ្យុទាក់ទងមកនៅខាងមុខ បន្ទប់ជួលរបស់គាត់ផងដែរ ។
ជាចុងក្រោយបុរសជាប្តីបានបញ្ជាក់ថា នៅព្រឹកថ្ងៃទី២៨ ខែវិច្ឆិកា គាត់ទៅដាក់ពាក្យបណ្តឹងហើយយកម៉ូតូទាំង២គ្រឿងនេះជាភស្តុតាង បើសិនជាប្រពន្ធរបស់គាត់នៅតែមិនស្តាប់តាមគាត់ទេនឹងបែកគ្នាហើយគាត់នឹងយកស្ត្រីខាងលើនេះធ្វើជាប្រពន្ធតែម្តង ។
នៅព្រឹកថ្ងៃទី២៨ ខែវិច្ឆិកា ទាំង២នាក់ប្តីប្រពន្ធ ត្រូវបាននគរបាលប៉ុស្តិ៍បឹងទំពុន ហៅទៅសម្របសម្រួលគ្នា ដោយភាគីខាងប្តីយល់ព្រមមិនដាក់ពាក្យបណ្តឹងទេ ទោះបីជាម្តាយរបស់គាត់រងរបួស និងស្ត្រីដែលចោទថា ជាសហាយក៏រងរបួសដែរនោះ ។ ចំណែកខាងស្រីចង់ដាក់ពាក្យបណ្តឹង តែសមត្ថកិច្ចបានលើកហេតុផលណែនាំទើបភាគីទាំង២យល់ព្រមមិនប្តឹងប្តល់គ្នា ហើយម៉ូតូ២គ្រឿងរបស់បងប្អូនខាងប្រពន្ធក៏បានប្រគល់ឲ្យវិញ ៕
កូនអកត្តញ្ញូស្រវឹងស្រាខឹងម្តាយស្តី បន្ទោសទាញកាំបិត កាប់របួសធ្ងន់
សៅរ៍ ២៨ វិច្ឆិកា, ២០១៥ ម៉ោង ១៥:៥៤
ខេត្តបន្ទាយមានជ័យ ៖ កូនប្រុសយកកាំបិតបុ័ងតោកាប់ម្តាយ បណ្តាលឱ្យរងរបួសធ្ងន់ ព្រោះតែខឹង ស្តីបន្ទោសរូបគេមិនឱ្យ ផឹកស្រា និងសេពគ្រឿងញៀន ដែលហេតុការណ៍នេះ កើតឡើងកាល ពីរសៀលថ្ងៃទី២៧ វិច្ឆិកា ២០១៥ នៅចំណុច អគារការដ្ឋានសំណង់ មួយកន្លែង ក្នុងភូមិព្រៃព្រិច សង្កាត់ប៉ោយប៉ែត ប៉ោយប៉ែត ។
ប្រភពបានឱ្យដឹងថា កូនអកត្តញូខាងលើឈ្មោះអូន អន អាយុ៣២ឆ្នាំ ជាកម្មករសំណង់ ស្នាក់នៅ កន្លែងកើតហេតុ និងមកពីភូមិ ត្រពាំងថ្ងាន់ ឃុំ-ស្រុកត្រពាំងថ្ងាន់ ខេត្តកំពត ។ ចំណែកម្តាយរង គ្រោះឈ្មោះឈឹម រ៉ន អាយុ៤២ឆ្នាំ របួសក្បាល២កន្លែង ត្រូវបុរសជាប្តីនាំ យកទៅព្យាបាលនៅគ្លីនិក ។
